Эмчи дир мен
Эмчи-дир мен, мени дыңна күжүр өңнүк
Эмин эртир эшкедеве, оожургап көр.
Эрээн шокар өртемчейде кончуг халап,
Эжик-хаалга ажа тырттып кирип келди.
Кажан шагда туруп көрбээн каржы аарыг
Каптагайны эжелепкен меннип туру.
Халдавырлыг, чыпшыныы-чал казыргының
Хайын көрген хамык чоннар түреп турлар.
Чыпшырганнар муң-муң кижи өлүп, хораан
Чырык черни кара хүннер ээлей берди.
Сайзыраңгай чурттар безин сандан үнүп,
Саймааралга алзывыткан дүвүреп тур.
Хүндүткелдиг тыва чонум боданыңар
Хүлүп, тудуп шуптуңарны шыдавас бис.
Хамчык дошкун аарыгны өөскүтпес дээш,
Хаалгаңар дээктенгештиң дыштаныңар.
Аарыг-аржык тарай бээрге эмчи кижи
Ажылынче чүткүп орар, шилилге-дир.
Эргин артап кудумчуже үнмес силер,
Эмнелгеге силерни дээш ажылдаар бис.
Сүлдевисти чалгынналдыр судурлаткаш,
Сүзүк-биле сегидерин бодаар херек.
Кадык-чаагай чуртталганы сурап чоруур
Камгалакчы эмчилерни утпас силер.
Юрий Тун-оол 30.03.2020.
#Тыва#ЧааХолкожуун#Эмчилер
