«Роспотребнадзор» эргелели өөредилге болгаш социал албан черлеринче педикулезка удур профилактиктиг ажыл чорударының дугайында чагааларны чоруткан.
«Роспотребнадзор» эргелели өөредилге болгаш социал албан черлеринче педикулезка удур профилактиктиг ажыл чорударының дугайында чагааларны чоруткан. Педикулез (быт) аарыы делегейде нептерээни-биле школа-интернаттарда уругларны, инвалидтер болгаш хоочуннар бажың-интернадында кижилерни шыңгыы хайгааралга алырын дааскан. Тус чер-чагыргаларын сумуларда чеже чунар-бажыңнар барын, социал албан черлеринде дезинфекция кылыр камералар-биле хандыртынганын хынаар. Школаларга, уруглар садтарынга санитар-эпидемиологтуг станцияның, эмчилерниң, социал албан черлериниң специалистери-биле профилактиктиг ажылды чорудар.
Шинчилел ажылдарын чоруткан түңнелинде быт сугдан кортпас, арыг баш дүгүнге ынак болгаш кедергей шимченгир бооп турар. Идик-хеп быды, баш быды база адаккы орган быды деп үш аңгы хевир бар. Идик-хептиң болгаш баш быды янзы-бүрү халдавырлыг аарыгларның тарадыкчылары болур. Быт ызырган кеш ириңнелип, хуулуп, аллергиялап болур.
Педикулез аарыын аарыг кижиден чыпшырып ап болур. Садыгларга, поездиге, бассейнге дээш оон-даа өске хөй-ниити черлеринге чыпшырып алыр. Ылаңгыя сыртыкка, автобус азы чиик машинаның баш салыр черинге быттар 2-3 хонук манап чыдарлар.
Бичии уругларның баштары быдаан таварылгалар эвээш эвес. Ынчангаш уругларны арыг-силигге өөредип, өске кижиниң чаш кыстырар заколказын, резинказын, чаш дыраар дыргаан, чоттунар аржыылын, наушниктерин ажыглавас, өске кижи бөргүн кетпес кылдыр өөредир. Уругларның иштики хевин, ак-чоорганын доктаамал солуур, эки чундурар. Идик-хевин изиг илиир-биле базар. Үе-үе болгаш-ла уругларның баштарын ажып көрүп турар болза эки. Бир эвес быдый берген болза, аптекадан саткан эмнер-биле хораннаар. Халыыр-кара (блоха) узуткаар хоран ажыглавас. Халыыр-кара хораны-биле баш дүгүн хораннаптарга, амы-тынындан чарылган таварылгалар бар. Баш быдын чаңгыс хүн төндүр аштап шыдавас, ынчангаш шүүрээр, үргүлчү чуур, дыраар.
Удуртукчуларны, эмчилерни өөредилге черлеринде, уруглар садтарында бичии уругларның бажын доктаамал хынап, ада-иези-биле харылзажып, уругларның бажы быттыг болза, арыглап, аштап алгыже дээр школаже, уруглар садынче чорутпас кылдыр ада-иези-биле дугуржуп алырын сүмелеп турар.
